رئيس مجلس الادارةمنى يحياوي
رئيس التحريرمنتهى بطرس
أخر الاخبار

إبنك السيّد – للشاعر المصري – سيد منيرعطيه


 

 

باقوم م النوم

وباغسل عيني بشوارعك

وميادينك

وناس أطيب من الطيبه

بكل الحب عاشقينك

وشوشهم دايبه ف ملامحك

ونورهم من ضيا جبينك

تشاور بس بيمينك

يجيك عامل

يجيك فلاح

يجيك حارس

يهدّوا البرد لو قارس

يشقّوا الجلد ويدفّوك

ولادك يا وطن يهدوك

ف عز التوهه للسكّه

يداروا الدمع ف عيونهم

ويرموا ف عينك الضحكه

ولو حسّيت ف يوم شكّه

تلاقي الكل قال الأه

بصرخه يكش منها الرعد

ولادك حتّه من صُلبك

وحضنك كان يا وطني المهد

وبعد العمر ما يعدي

ف أرضك للولاد اللحد

وانا عاشقك يا وطني بجد

واقوم م النوم عشان اغسل

عيوني بكل شئ جوّاك

واوضّي القلب بنشيدك

وكل ما فيك هنا أهلي

من الأطلنطي لخليجك

يا سيّد إبنك السيّد

بيحلف يبقى طوع إيدك

بيحلف ترجع الحاكم

وكل الدنيا دي عبيدك

ويحلف بالهوى يزيدك

عشان تصبح أمير الكون

م انا العاشق تراب أرضك

وانا ف حبك بقيت مجنون

وانا الكائن منين ما تكون

كما الدرويش على بابك

أنا السيّد منير وانت

أبويا واخدني ف رحابك

وانا السطر اللي ف كتابك

وبيعلّم جميع الناس

حروف إسمك

حدود أرضك

تاريخ مجدك

وانا ف الليل تصحّيني

أجيب شمس النهار عندك

وانا حِصنك

وانا سدّك

وانا لمّا الزمان بيدور

باكون قبل الجميع جنبك

ولو ( تعتر ) ف أي طريق

أكون وسط الطريق سندك

م انا إبنك

وإبنك مهما عاش ف القهر

ح يفضل ..

برضه إبن حلال

سيد منيرعطيه

عضو اتحاد كتاب مصر

من ديوان (( دقي يا مزيكا))

Facebook Comments

  •  
    354
    Shares
  • 354
  •  
  •  
  •  
  •  
  •  
  •  
  •  
  •  
  •  

شارك برأيك وأضف تعليق

2018 ©
%d مدونون معجبون بهذه: