رئيس مجلس الادارةمنى يحياوي
رئيس التحريرمنتهى بطرس
أخر الاخبار

الورد فالزقازيق للشاعر المبدع / على ابو المجد / عزف الأقلام


إسمي : علي
مولود ف يوم عاشوراء
و الروح مداين .. ما كنتش عراء
حامل كتابي ب اليمين / لكن
واقف على باب سورة الشعراء

رق الندى ..
ع الورد و ف عيني : ندى رقرق
و العدل أولى /
ﻷ ؛و أعلى .. بس مش ع الحق
من تل بسطة / ل شارع البوسطة
و لحد بحر مويس
شفت العصافير الغلابة
بينشدوا “الزقازيق”
ع القنطرة التاسعة :
بتسعى .. قبل شق الريق
ف تدور سواقي الرزق / لكن ..
مين له حيل ل الزق

شارع فاروق ..
الجي و الرايح : عرق ؛و هموم
ما تقولش ليه ؛و ازاي ؟!!
الحزن معلوم مش خفي /
زي الضحى ؛و الدم
و الليل أكيد : صاحب وفي ..
بس القمر وشاي
إسأل عليهم : عند “دار الشاي”
تلقى “ابراهيم حامد” ..
يقابلك : ب المودة الأم

جنب المحطة ..
القطر صفر لي
رديت عليه : يا حلو سفرني
كان عودي أخضر ..
إيه مصفرني ؟!!
غير الشعور ب الغربة بين الأهل
القطر قال لي :
يا اللي أمرك سهل
إيه يعمل اللي غربته جواه ؟!!
صادف بكايا : شكوته و نجواه
عيطت / ساب دخانه : عفرني

خدني الطريق ..
ما دريتش كيت من كيت
ملعون زمان :
العولمة المسعور
أفعى : ف جوف الحلم لداغة
خلاني أعمى /
و اما فقت رأيت ..
كوبري الزراعة : داس على الصاغة

كانت جناين ..
ليه بقت أسفلت ؟!!
و جبيني عالي / عمري ما أسفلت

ف ازاي أقول :
راجع لكم و ماجيش
يا مبدلين لي جلدكم : ب الخيش
هين كفاحي .. ليكوا مهما بذلت
الشمس : بنت ..
بتبكي ع الكورنيش
و آدي الحضارة الخام بتتجسد ..
ف الذاكرة /
؛و كتاب تاريخنا بازلت

“عمرو البطل” ..
بيقول لي : أذكرني
و آنا اللي طول الهم أسكرني
مريت و قبلي “يوسف النجار”
من “تل بسطة” ..
مر – صاحب دار –
وصاني قبل الآزفة : أختار
ف نسيت ..
؛و لكن “عيسى” : فكرني

و كأني جنبك و انت ب تسمي
يا “أحمد عرابي” .. يا ولد : فلاح
تفاح خدود الباشا : من دمي
يا اسمر : ب لون القمح ؛و الإصلاح

شوف قد إيه ؟!!
يا صاحبي عشنا ؛و شوف ..
“هرية” ب تقول كلمة “الأحرار”
و المجد يلزم له .. أمل ؛و قرار

لما سألت .. الشعب كله صغى
في لحظة كان ..
فيها الزمان اتلغى
إزاي هيحكم ع الرجال الأغا ؟!!
و ازاي يا مصر هتصبحي أمصار !!!

من قبل حتى الدنيا ما تفتح
كانت حبيبتي واقفة ف البلكون
و لوحدي واقف تحت سقف الكون
ب الإنسانية البكر متسلح
ف ازاي يلام ..
اللي ف هواه أنذر
تضحك “هدى شعراوي” ع المنظر
عيني الشمال ..
ب ترف / ولا دي اليمين ؟!!
ما دريتش غير ..
؛و القطر : بيصفر

يا قلبها اللي ياما : رد ؛و خد
ماعرفش ليه ..
لو تبتسم تتخض ؟!!
بان الكلام الشفتشي ع الخد
عايق ..
ب دم اللي انقتل : معجون

ماتفرفطيش يا دموع ..
؛ولا تنحبسي
ماتقربيش : م الذكريات /
تتلبسي
ما تعشميش يوم : في دفا الخدين
و كفاية تبقي ف العيون : لمعة

أربع سنين : م العمر رايح / جي
أنعي اللي مات ..
؛و اجبر ب خاطر حي
ناموا القطط ..
ف الطرقة جنب الناس !!
و الحزن : هو الحزن ف الحالتين
كان ف “القديمة” ؛ ولا ف “الجامعة”

ف ازاي اقول : الهزل ف المأساه
يا شمس هاتي ..
اللي انتي مش وخداه
هاتي “ضياء” ..
يحكي لي و احكي له
حنت دموعي : ل عطف منديله

من مر حال الناس ..
ف “ابو مكي”
“الصيادين” : ف الضحك ب تبكي
دلوقتي ليه ..
ف عنينا ب تسكي ؟!!
شيش الأمل .. ؛و تضلمي يا حياة

يا مركب النور يا اللي عايم /
بين الدموع ؛و بحور غمايم
دا دمع ؟!!..
ولا دي حجارة : جاية من سجيل
العين ب تبكي ؛ و الأمل : دايم
العين ب تبكي – حتى يوم العيد –

زي الكنال ؛ و البحر .. زي النيل
و الصبر : ورث الشعب جيل من جيل
من قبل قبل الذاكرة
و لحد يونيه
شهر سته أكئب المواعيد
بصيت لقيت :
“بحر البقر” ما كنتش مني بعيد
خمسين سنة عدت ..
؛و لسه الجرح مش نايم

م المدرسة ..
ل الجامعة .. ل الشارع
ربيت خيال /
كان ف الأمل : بارع
ياما ناديت ..
يا اللي انت مش سامع
من يوم ما شفتك : ما شبعنا فراق

لو كنت أقابلك يا حبيب / اديك
من صلب روحي ..
ورد : يسترضيك
و عيال ب تصحى ..
قبل صوت الديك
قالت : يا “بابا” .. قلت : يا “رزاق”

قالوا : غريب ..
أنا قلت : ما يعبشي
لفيت كتير ،، و القلب : ما تعبشي
إمسك ف ضلي ..
يا ابني ما تسبشي
مش كل ريش فوق الجناح : طيّار
مش كل طير .. يا فرخ : حدّاية
مهما تكون الدمعة جرّاية
هي : الضنا ،و الأم ،و الداية
هي النهار : اللي ما بعده نهار

كات روحي لسه ..
ب تستوي على مهل
و عيوني كانت ..
تسقي خدي مهل
يا مفكرين : إن الوداع ب السهل
شيلوا حمولكم من على الاكتاف
ب اضحك لكم /
ما تعيطوش .. غنوا
و استنوا .. يمكن بعدي تتهنوا
فرحة عدوي : بينت سنه
و انتوا اللي واكلين لحم قلبي : حاف

زي الدهب
ما يبنش غير ب النار
طبع الأصيل ب تزينه الكربة
قابل لكم ..
في أي شئ : أعذار
إلا المودة في ذوي القربى

تلت زغابى : يشبهوني كتير
نازله ف وريدي ..
؛و الكفوف تنقير
من قبل “آدم” / شفتهم ف اللوح ؛
و بنيت لهم :
– عش – ف غصون الروح
ياما تعبنا ..
؛و ياما شمس تفوح
ع المطرحة / يا ريحة الجنة
الدم : دمي .. ؛ولا دي حنة
ياااه يا جدع
حتى ف حضن الأهل فيه غربة ؟!!
#علي_أبوالمجد

Facebook Comments

  •  
    329
    Shares
  • 329
  •  
  •  
  •  
  •  
  •  
  •  
  •  
  •  
  •  

شارك برأيك وأضف تعليق

2018 ©
%d مدونون معجبون بهذه: