رئيس مجلس الادارةمنى يحياوي
رئيس التحريرمنتهى بطرس
أخر الاخبار

غرامك زوبعه…بقلم الشاعر/سيد منير عطيه


البحر يشبه للكفن
مالهوش جيوب
زي الحنين مبدور قلوب
زي المطر يغسل سحاب
ينزل على كتف الغياب
وينادي شوق على اللي انصهر
واللي انكسر
واللي احتضر
ويعبّي ف كفوفه القمر
ويروح بعيد
يعزف من الأمواج نشيد
للي اقترب
واللي اغترب
واللي بيرسم ضحكته
مع إن قلبه بينتحب
ف ما تهربيش من غير سبب
وما تدبحيش قلب الغرام
بكلام عبيط
د الحب عمره ما كان لقيط
ولا عمره كان متعبّي خوف
ولا حتى كان حسب الظروف
ع الفطره طيّب مش حويط
يشبه قوي الطفل الوليد
محتاج رعايه ف كل شئ
محتاج حنان
محتاج دفا
محتاج تكوني منصفه
وتطبطبي بشويش عليه
محتاج لحضنك ف الشتا
تاخديه عشان يتدفّى فيه
مش لمّا إعصار المطر
يزعق خطر
ع البحر تجري وتحدفيه
دا ان كان غرامِك زوبعه
الموج أكيد أرحم عليه
الحب محتاج تنصفيه
أو تلحقيه قبل الغرق
مش تعمليه مركب ورق
تتسلّي بيه وقت الفراغ
وتقطّعيه وقت القلق
ولا حتى يقبل تحدفيه
على طرف موجه مروّحه
علشان يبوش
سيد منيرعطيه
عضو اتحاد كتاب مصر
من ديوان ( قلبي مُجرم)

Facebook Comments

  •  
    354
    Shares
  • 354
  •  
  •  
  •  
  •  
  •  
  •  
  •  
  •  
  •  

شارك برأيك وأضف تعليق

2018 ©
%d مدونون معجبون بهذه: