رئيس مجلس الادارةمنى يحياوي
رئيس التحريرمنتهى بطرس
أخر الاخبار

كرباج عذاب- للشاعر المصري – سيد منيرعطيه


مستني إيه
من قلب شافك ف الطريق
غرقان وجع
وما هان عليه
يفرد دراعه وينجدك
مستني أيه
من حُب كان كرباج عذاب
إديته إحساس الدفا
بقى كل ساعه بيجلدك
مستني ايه
من حب دايما توجده
ومُصّر دايما يفقدك ؟
مستني وجعك يسعدك ؟
تبقى اللي جاهل بالأمور
دا مافيش ف عين الضلمه نور
وما فيش مكان غير للصقور
وانت اللي قلبك طير حمام
ومافيش إيدين تتمد لك
ما أجهلك
لو كنت لسّه بتفتكر
إن اللي قلبك دق لُه
ح يكون ملاك بجناح وريش
وح يرمي نفسُه ف الهلاك
علشان تعيش
صدّقني دانت ما تساوييش
ف عيونه غير نزوّه وخلاص
حُبُّه اللي شوفته ف يوم كبير
كدب ومالوش أبدا أساس
كان هدفه يمشي ف الحياه
عامل مع العُشّاق تناص
واكمنُّه بالكدب ابتلا
ظهرت حقيقته ع الملأ
لحظة ما شافك ف الغرق
ما حاولش يفردلك إيديه
ولا يرمي حتى طوق نجاه
ولا حتى يتصعّب عليك
مستني إيه
من قلب معدوم الحياه
خبّيته فيك
مستني إيه
من قلب شمتان ف الدموع
النازله من بحرين عينيك
دا مافيش ياقلبي ح ينجدك
غير طبطبة لمسة إيديك
ياريت تفوق
طبطب على روحك قوي
وامشي ف عكس الإتجاه
جايز تلاقي نهار جديد
أو نجم ف الليل العنيد
بيرُش لك ف السكّه ضي
ويمدلك بالحُب إيد
ف تروح معاه
وان حتى كنت هناك وحيد
خلّيك وحيد
إن شالله حتى تموت وحيد
أحسن كتير من لو تموت
من طعن غدر الغشاشين
موت مرّه واحده بعيد عشان
لو جيت هنا
صدّقني ..
ح تموت مرتين
سيد منيرعطيه
عضو اتحاد كتاب مصر
من ديوان ( كرباج عذاب )

Facebook Comments

  •  
    352
    Shares
  • 352
  •  
  •  
  •  
  •  
  •  
  •  
  •  
  •  
  •  

شارك برأيك وأضف تعليق

2018 ©
%d مدونون معجبون بهذه: