رئيس مجلس الادارةمنى يحياوي
رئيس التحريرمنتهى بطرس
أخر الاخبار

مابزعلشي – للشاعر – رضا أبوحسين

  • ثقافة
  • 05 مايو 2017
  • 731 مشاهدة

مابزعلشي
ولا باخد على خاطري
وبضحك للي جارحني
وبسرق م الهموم فرحه
وامثلها … تريحني
وباستحمل كلام الناس
مع انه كتير بيكون
سموم ف عروقي تدبحني
وبرضه بقول مايجراشي
واطنشهم
وماازعلشي

مابتنمردش
ورامي تكالي ع الخالق
ف أيده قسمتي وحالي
وانا راضي ب أحكامه
مابتلككش
واسامح كل من باعني
وباتمنى يكون مبسوط
ولو بعده بيوجعني
ولو بعده هاعيش الموت
مابتألمش
واهم حبة وجع وتفوت
ولو حتى ماهتفوتشي
مابزعلشي

مابندمشي
على اللي كان
وراضي باللي ف الإمكان
مابتئمرش
ومش معنى الرضا يعني
تقولوا عني حد جبان
دانا زي الجبل شيال
وباتحمل كتير اهوال
وعمري ف يوم ماابات ظالم
ولا اتسبب انا ف احزان
ولو حتى هاكون مظلوم
مابزعلشي

مابسكتشي
ولا (بيكل يوم متني)
بادعبس وسط بحر اهات
على ضحكه
تضحكني
مابلقاشي
مابيأسشي… أألفها
واحاول اني ارسمها
واضحكها
مابعرفشي
ومهما تعبت م المشاوير
ومهما طالت السكه
باكملها وماتعبشي
وحتى لو طريقي خان
وتوهني
مابرجعشي
ومابزعلش
انا ف عز الوجع زارع
غناوي للأمل ف الله
عشان جوايا انا راضي
بإنه وحده راعيني
ومابيغفلش
فسبحانه عظيم شانه
حكم عادل
ومابيظلمش
ولو حتى ابتلاني ف يوم
باكون شاكر
ومابزعلش

Facebook Comments

  •  
    358
    Shares
  • 358
  •  
  •  
  •  
  •  
  •  
  •  
  •  
  •  
  •  

شارك برأيك وأضف تعليق

2018 ©
%d مدونون معجبون بهذه: