رئيس مجلس الادارةمنى يحياوي
رئيس التحريرمنتهى بطرس
أخر الاخبار

ما تسويش حاجه -للشاعر المصري – سيد منيرعطيه


أيوّه انا سيبتك تغلطي مرّه
تغلطي عشره
مدّيت كل خيوط العِشره
وقطعتيها
كل سنين العمر الفايت
دوستي عليها
دايرة شر كبيره وكنتي
لواحدك فيها
سيبتك تاني تغلطي ميّه
تغلطي ألف
لما بقيتي ف أخر الصف
وامّا فتحت القلب لقيتك
واقفه بعيد على طرف الطرف
يعني خلاص مالكيش جوايا
شئ يشفعلك
أخرجي كُلّك
حتى ان خرج الدم معاكي
مش ح اندهلك
وايّاك تنسي ف لحظه خيانتك
أنا مش ح انسى
حتى ان كنت بحبك لسّه
عمري ما ح انسى
ح افضل دايما فاكر وجعك
فاكر جرحك
ح افضل فاكر مهما عملتي
طعنة غدرك
وانّك خونتي
وانّك لمّا بقلبي لعبتي
كان علشان مُخلص بيحبك
أخرجي كُلّك
واوعي تسيبي خيالك فيّا
أو فتفوته تبان من ضلّك
لمّي قوام كل اللي فاضلك
ورقه بخط الإيد من ريحتك
صوره قديمه
ظرف جواب
روحي ورُدّي وراكي الباب
أنا مش عايز منّك شئ
روحي براحتك أي طريق
إنتي خلاص ف قرارة نفسي
ما تسويش حاجه
يعني لا شئ
بس نصيحه
لمّا يقابلك قلب برئ
إبعدي عنُّه
أصل حرام من سِمّك غيري
يشرب مِنُّه
وحرام ناس من بعدي يئنّوا
ما تعاشريش البني أدمين
روحي ف ضلمة ليل واختاري
ضلمه بيعشقها شياطين
دول أتباعك
ح تلاقي فيهم نفس طباعك
نفس سلوكك
نفس ملامحك
واللا أقولك …
روحي ف أبعد رُكن ف صحرا
موتي لواحدك
سيد منيرعطيه
عضو اتحاد كتاب مصر
من ديوان (كرباج عذاب)

Facebook Comments

  •  
    354
    Shares
  • 354
  •  
  •  
  •  
  •  
  •  
  •  
  •  
  •  
  •  

شارك برأيك وأضف تعليق

2018 ©
%d مدونون معجبون بهذه: