رئيس مجلس الادارةمنى يحياوي
رئيس التحريرمنتهى بطرس
أخر الاخبار

يوم بعد يوم- بقلم الشاعر – سيد منيرعطيه


يقف الزمن ..
لحظة ما نرجع بالصور
ونعيد شريط الذكرى
تاني ف عقلنا
حبّة سنين من عمرنا
كانوا هنا واتفرفطوا
ورق الشجر مين عيّطوا
نزّل دموعه مع الندى
نرجع شهور
نرجع سنين
نرجع هنا للمبتدا
كنّا البراءه ف توب جميل
كان إي عصفور ع الشجر
نناديله .. بيلبي النِدا
كنّا الضلال اللي اهتدى
ف عيون فراشات الغيطان
كنّا السواقي المليانين
كنّا السنابل والعيدان
فجأه الخريف سن السنان
جز الشجر
قطف الورود
حط السنابل ف التابوت
خلا الغيطان صبحت خراب
خلا المكان بينز موت
واحنا السنين اتفرفطوا
واتسرسبوا يوم بعد يوم
كل الحصون اللي اتبنت
الليل كسرها ف الهجوم
ما بقاش فراشات ف الغيطان
ما بقاش عصافير ع الشجر
ما بقاش هناك غير بس بوم
حتى السما صبحت غيوم
واحنا كمان ..
ما بقاش خلاص
شكل البراءه ف وشّنا
تايهين سنين عن بعضنا
وبقينا أغراب ف الحياه
يمكن كمان عن نفسنا
ما فاضلش شئ بيضُمّنا
غير لما نسرح ف الصور
ونعود لأول عهدنا
وساعتها بس بنفتكر
حبّة سنين
إتفرفطوا
سيد منيرعطيه
عضو اتحاد كتاب مصر
من ديوان ((كرباج عذاب ))

Facebook Comments

  •  
    354
    Shares
  • 354
  •  
  •  
  •  
  •  
  •  
  •  
  •  
  •  
  •  

شارك برأيك وأضف تعليق

2018 ©
%d مدونون معجبون بهذه: